ANSONBEAN任美容中心代言　預告下半年推出新歌新碟新劇

陳毅燊（ANSONBEAN）最近獲男士激光脫毛及美容中心邀請成為該中心首位代言人，早前拍攝一系列以「Don’t limit yourself」為主題的廣告，連紅隧口也擺放超大型廣告版，非常搶眼。

首次成為美容中心代言人，ANSONBEAN份外落力，他說：「收到代言美容中心呢個消息，覺得經理人係咪搞錯咗？因為我覺得自己唔係最靚仔，之前成日都見人做美容代言，竟然自己可以做到，所以我真係好開心同好榮幸。」

ANSONBEAN街頭拍《IMPATIENT》MV　陳毅燊除外套騷肌引圍觀者歡呼

▲ 陳毅燊（ANSONBEAN）

男女也可貪靚

廣告中，ANSONBEAN以多個造型出現，其中穿黑色裝look非常有型，說：「除咗西裝造型感覺classy，都有着背心，有少少sexy嘅新鮮感，平時都有健身練肌肉，但今次就用咗個幾特別嘅方法，我教練教我拍攝前一日唔飲水，到拍攝當日食咗一個黑森林蛋糕，令到糖分上升，肌肉脹大，出到嚟都好滿意。」

貪靚並不是女生的專利，ANSONBEAN非常認同，他認為男女也可以貪靚，稱：「無可否認人好多時都係睇第一印象，每個人都有唔同方法令自己更加有自信，例如化妝、set頭，男仔同女仔都一樣，都要照顧好自己嘅外表，令到自己更加有自信、更加有準備同尊重場合。我有啲位會比女仔貪靚架，不過我知道唔可以依賴，我而家都鍛鍊緊自己，唔可以因為唔靚就缺乏自信，希望自己能夠着睡衣都可以落街，有自信地面對大家。」

▲ 陳毅燊（ANSONBEAN）

不被定型保持進步

ANSONBEAN認為身體健康是漂亮的來源，還提醒男士脫毛的重要：「身體健康係最重要，其實男士脫毛都係好好嘅護理心得！儀容上美觀好多，男士都要學識修理自己嘅毛髮。」

而廣告主題『Don’t limit yourself』碰巧也是ANSONBEAN人生座右銘之一，稱：「我聽到呢個主題都覺得好有共鳴，我覺得人任何時候都要學習、鍛鍊同突破自己，有人講過，好多人25歲已經死咗，直到70歲先入墳墓，就係講人喺25歲就停止學習、成長同進步，人生已經冇意義，所以我覺得任何時候都唔可以令自己定型，要保持進步，呢個世界好多有趣嘅嘢可以學習，任何時候都有進步嘅機會，我有好多嘢都想由內到外進化，畀大家睇到個新嘅我。」

▲ 陳毅燊（ANSONBEAN）

拍武打短片受傷

近年ANSONBEAN熱愛武術，學習各式各樣的武功與跆拳道，更落足心機自度武打短片。不過，早前他不幸在拍攝期間弄傷後腿導致肌腱撕裂，說：「之前拍reels時後腿肌腱撕裂，停止咗動作訓練一段時間，而家踢腳動作有少少影響，其他都好返嘞，行得跳得，希望可以完全康復。」

ANSONBEAN將繼續多元發展，之前跟泰妹於《Chill Club》頒獎禮表演《CALL ME(Late At Night)》，大獲好評，說：「因為我嘅歌都係玩得開心同熱鬧跳舞，希望可以多啲機會有跳唱現場表演畀大家睇。我而家都籌備緊新歌，嚟緊都會有新碟出，同時新劇都會出街，係好期待，希望嚟緊繼續有更多新嘅作品同大家見面。」

最新影片推介：方太專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5